عيني و خزرتها

مثّلتو في قلبي فتيلة
عشقت نارو لي حرقتها
ما قدحت من زيت امباره
دايا من عيني و خزرتها
الصّعقة تجي من تالاها
شهّالة وهاذي صنعتها
بدّّالة و مغرومة نجدّد
كي اللّا البيّة في جنينتها
ما تخيّر في ربيع مربّع
كان الوردة في عتقتها
من شمّة للرّوح تكفّي
وتحلف ما تعاود خزرتها

اما النّوارة هذيّ
خسارة كلّ الّي سبقتها
يا ذنوبي و حسيبي ربّي
كان شمّة تطفّي حريقتها

من غزرة حلفت عينيّ
لاعاد تسكّر شفرتها

قشرة بايات اسطنبولي
آش جابو لورد جنينتها

قهرتني و خذلني طولي
ما أعلاها وماوفح ريحتها
بدمي نسقيها و بدموعي
كي نقلّعها من شجرتها